"Hizb ut-Tahrir" davasınıñ mabüsi Tofik Abdulgaziyev ağır hastalıqlardan, şu cümleden, aqciger, yürek hastalığından ve MRT vastasınen tapılğan miy şişkten sebep ağır alda buluna. Bu aqta onıñ apayı Aliye Kurtametova Facebook saifesinde haber etti.
"2024 senesi saban ayından berli Tofik ayat ve ölüm arasında. O, bir diagnozdan qurtulğan soñ endi yengillk duyıp başlaymız, o ise ekinci diagnozğa oğray. Eki taraflı pnevmoniya, sol taraflı kiçik gidrotarakc (yürekte şingenlik), anemiya, mitral klapanı zararlanğan ve bağlama toqumanıñ displaziyası(yürek hastalığı), hronik yürek yetişmemezligi ve gastrit, nefrolitiaz (büyreklerde taşlar), köküs içindeki limfa tüyümleri zararlanğan disseminerlengen aqciger tuberkulozı", - dedi o.
2024 senesi orta küz ayında qorantası, Tofikniñ alı stabilleşkeni içün onıñ apishane hastahanesinden çıqarmasını bekley edi. Orta küz ayınıñ 14-nde qısqa müddetli körüşüv vaqtında qadını, onıñ daa yahşı körüngenini qayd etti. Amma boş ayda Tofik körüv fenalaşqanından şikâyet etip başladı.
Mahkümniñ apayı, ilk qış ayınıñ 1-nde aqayını şeer hastahanesine MRT teşkerüvi içün alıp ketkenlerini bildirdi.
Qadınnıñ sözlerine köre, apishaneniñ hastahanesinde mabüsniñ onkomarkerleri teşkerildi, neticesi menfiy çıqtı. Lâkin aqayınıñ diagnozı tam olaraq belli degil. Oña malümat berilmey, deyler.
2022 senesi quralayda Rostov-na-Donu Cenübiy okrugınıñ arbiy mahkemesi Abdulgaziyevni 12 yıl sert rejimli koloniyada qalmasına üküm etti. İlk beş yılını o, apishanede keçirmek kerek. Bir yıl soñra, 2023 senesi quralayda, Vlasiha şeerindeki İstinaf arbiy mahkemesi birinci instantsiya mahkemesiniñ qararını deñiştirmedi.
