İstegenler koalisiyasında şimdi 30-dan ziyade memleket iştirak ete, ve olarnıñ Ukrayinağa qoltutuvda rolü ayrı vesiqada qayd etilgen, dep bildirdi Ukrayina prezidenti Volodımır Zelenskıy. Bu aqta o, ilk qış ayınıñ 16-nda Felemenk baş naziri Dik Shoof ile matbuat konferentsiyasında ayttı, dep haber ete Azatlıq Radiosınıñ mühbiri.
"Er bir memleket olarnıñ rolüni ya da ketirilgen miqdarını çoqusı allarda añlay. Ve kim yalıñız istihbarat bermege azır, kim ordu ya da topraqta ordunı temin etmege azır. Bu vesiqada öyle şey bar ki, biz bu vesiqanı tarqatmaycaqmız dep añlaştıq", — dedi o.
Ukrayina prezidenti qayd etti ki, koalisiya Ukrayinağa telükesizlik kefaletini tek ateş toqtatılğan soñ bermege azır olğanına endi qarar aldı:
"Bu umumiy qarar edi. Yani, ateş toqtatılğan soñ olar azır olacaqlar, ve qaysı memleket ne temin ete bilecegini köreceksiñiz. Farqlı statuslar bar, olarnıñ öz anayasaları bar, yani devletlerniñ farqlı statusları bar, şunıñ içün olar farqlı şeylerni temin ete bileler".
Zelenskıy, koalisiya Frenkistan ve Büyük Britaniya reisligi altında çalışa, amma onıñ terkibinde"bir çoq memleket yardım etmege azır", dep qayd etti.
İlk qış ayınıñ 15-nde Avropa liderleri, Ukrayinanıñ ihtimal topraq ayırması aqqında er angi qarar, Avropa yolbaşçılığındaki çoqmilletli quvetlernen teminlengen telükesizlik kefaletleri berilgen soñ qabul etile bile, dep bildirdi.
