Avropa devletleriniñ liderleri Ukrayina prezidenti Volodımır Zelenskıy ile muzakereler neticesinde altı esas maddege esaslanğan Ukrayina telükesizligini temin etüv planını aydınlattı, dep yaza Azatlıq Radiosı.
Bu plan şularnı közde tuta:
- Ukrayinanıñ daimiy arbiy destegi ve barışıq vaqtında Ukrayina Silâlı quvetleriniñ sayısı 800 biñ insanğa qadar saqlanılması.
- Avropa yolbaşçılığında "istegenlerniñ koalitsiyası" çerçivesinde ABD destegi ile Ukrayina territoriyasında areket ete bilecek çoqmilletli quvetlerniñ teşkil etilmesi.
- ABD yolbaşçılığında ve halqara temsilcilerniñ iştiragi ile qurulacaq ateş toqtatıluvını nezaret etüv mehanizmi, ücümlerniñ erte ögüni almaq, bozuluvlarnı qayd etmek ve olarğa cevap bermek içün vaziyetni nezaret etmege imkân berecek.
- Ukrayinanıñ ğayrıdan tiklenüvine yatırımlar, rekonstruktsiyanı maliye etüv, Rusiye tarafından ticariy añlaşmalar ve zarar tazminatı. Avropa Birliginde Rusiyeniñ aktivleri buzlatılğan qala.
- Ukrayinağa qarşı istilâ ve ücüm olsa, arbiy, istihbarat, iqtisadiy ve diplomatik vastalarnen cevap bermek.
- Ukrainanıñ Avropa Birligine qoşuluvına qol tutuv.
Bazarertesi künü Berlinde Ukrayina ve ABD eyyetleri arasında Rusiyeniñ Ukrayinağa qarşı cenkini toqtatmaq planı boyunca muzakerelerniñ ekinci raundi yekünlendi. Zelenskıynıñ aytqanına köre, Amerika eyyeti ile muzakereler semereli ve tafsilâtlı oldı, amma topraq meselesi çezilmey qala.